ACTUALIDADE

O presidente da Autoridade Portuaria, Jose Benito Suárez Costa, asistirá esta semana en Madrid á feira Fruit Attraction, un punto de encontro para todo o sector da loxística de froitas e hortalizas que se celebra no recinto do IFEMA e congrega a máis de 2.000 expositores de 145 países diferentes. Entre eles, as principais navieiras e operadores hortofrutícolas do mundo. O Porto de Marín dispón dunha terminal de froita a pé de peirao con 230 metros de atracada e calados ata 11 m. A terminal conta con peiraos de carga, cámaras frigoríficas e unha gran capacidade de almacenamento, ademais de operadores altamente especializados na loxística destes produtos e un servizo de inspección áxil e eficiente a través do Posto de Control Fronteirizo. Ademais conta cunha terminal de contedores cun gran número de conexións reefer para mercadoría refrixerada. Suárez Costa viaxa co obxectivo de contactar con novos clientes para ofrecer os servizos dos que dispón o Porto e captar novos tráficos relacionados con este sector. Marín é actualmente primeira escala en Europa para unha liña transoceánica que transporta froita desde Brasil, antes de continuar roteiro cara a Róterdan e Dover. A mercadoría é fundamentalmente melón, sandía e mango e embárcase no porto de Natal. O porto recibe unha media de 1.000 toneladas en palés e varios contedores de froita en cada descarga semanal. O consignatario da mercadoría é a Axencia Marítima Davimar e a operativa de descarga realizarase en Davila Reefer Terminal, instalacións do Grupo Davila, situadas no Peirao Comercial Sur de Marín. A navieira que realizará o roteiro entre Sudamérica e Europa é Cool Carriers. O presidente da Autoridade Portuaria manifestou a súa intención de seguir traballando nesta vía porque Marín demostrou ao longo dos anos que é un porto “altamente competitivo e especializado con sobrada experiencia na operativa de mercadoría fresca como a froita”. Suárez Costa lembrou que este tráfico “require da participación de moitos axentes diferentes o que conleva un gran traballo de axilidade e coordinación de actividades ademais de operadores moi cualificados, algo co que conta o Porto de Marín”.