Thales, empresa líder en solucións ferroviarias en contornas portuarias, está a executar o proxecto de automatización e monitorización do Porto de Marín, en Pontevedra, grazas ao cal o Porto contará cun xestor dixital de axuda á explotación ferroviaria da rede de vías do interior do porto.
Tras os 15 meses de prazo de execución e máis de dous millóns de euros de orzamento, o movemento dos aparellos de vía do porto poderá facerse de forma automática e remota.
A automatización do Porto de Marín — o primeiro de Galicia en utilización de ferrocarril , e un dos primeiros de todo o sistema portuario do país no que se refire a porcentaxe de mercadorías en ferrocarril respecto ao total operado anualmente no Porto — é un ambicioso proxecto que supoñerá importantes melloras en dous aspectos esenciais, grazas ao cesamento das operacións manuais dos desvíos. Por unha banda, en canto á seguridade laboral dos traballadores, ao substituír elementos mecánicos que requiren esforzo manual por motores cuxo uso require formación específica. Doutra banda, en canto a eficiencia, xa que permitirá aforrar tempo e custos de manobras.
Para levalo a cabo dotarase a operativa ferroportuaria dun xestor dixital de axuda á explotación que integre a automatización dos elementos mecánicos, a sinalización e as comunicacións mediante fibra óptica. Do mesmo xeito, o sistema encargarase da verificación do seu estado, así como a monitorización local e central de toda a actividade ferroportuaria.
O proxecto incluirá a motorización de cambios de agulla, así como a instalación do equipamento asociado para a mellora e simplificación da operativa, o que permitirá a monitorización central da presenza de trens na zona do fai de vías do recinto.