Sustentabilidade

Jose Benito Suárez Costa, presidente da Autoridade Portuaria de Marín regresou de Valencia tras a celebración do I Congreso Nacional Portuario ao que asistiron máis de 650 persoas durante esta semana. Suárez Costa viaxou acompañado de varios directivos da Autoridade Portuaria dada a importancia dos temas para tratar nos diferentes relatorios que se organizaron ao redor de 12 mesas redondas e 4 conferencias. O presidente da Autoridade Portuaria aproveitou para manter contacto con diferentes empresas navieiras e consignatarias que poidan operar nun futuro polo porto. O presidente sinalou que algúns dos principais asuntos de debate no Congreso “son precisamente os grandes retos que estamos a asumir neste momento no Porto de Marín como o da dixitalización de servizos e o impulso á sustentabilidade co novo proxecto de electrificación dos peiraos da terminal de contedores”. O Congreso abordou a dixitalización como un dos grandes factores de competitividade dos portos, que converta ao conxunto do sistema portuario español “nun referente como motor económico, nodo loxístico estratéxico e pioneiro en innovación e sustentabilidade”. Outra das cuestións que estiveron presentes durante estes días foron a necesidade de reforzar a colaboración público-privada como base do modelo portuario de titularidade estatal. O sistema portuario estatal conta con 46 portos de interese xeral xestionados por 28 autoridades portuarias. Ata 2029 están previstas investimentos no seu conxunto por valor de 7.000 millóns de euros, tal como destacou o secretario de Estado de Transportes e Movilidad Sostible, Jose Antonio Santano, na conferencia inaugural.