A Autoridade Portuaria renova a iluminación interna das súas instalacións para afondar na eficiencia enerxética
A Autoridade Portuaria está a piques de finalizar a obra de mellora da iluminación interior das instalacións da súa sede, un sistema que estaba composto principalmente por luminarias con tubo fluorescente circular e por fluorescentes compactos.
A actuación, financiada con fondos europeos MRR, comprende a utilización de luminarias máis eficientes, con tecnoloxía LED, repercutindo na mellora das condicións lumínicas e a eficiencia enerxética das instalacións, Ademais redúcese o consumo eléctrico e a emisión de gases de efecto invernadoiro á atmosfera.
Os traballos consistiron no desmonte de todas as luminarias existentes de tubo fluorescente de diferentes tipoloxías (encaixadas a teito e/o a falso teito, encostadas en superficie e suspendidas), e a súa substitución por luminarias de tecnoloxía LED. Os traballos, realizados pola empresa IMESAPI, incluíron a adaptación de ocos en teitos e falsos teitos, pintado de teitos, falsos teitos e molduras, reposición de caixas de conexións e prolongación de liñas ou conducións.
As novas luminarias están fabricadas con materiais reciclados e impresas en 3D con emisións neutras de carbono. Nas zonas que contan cunha boa achega de luz natural, as luminarias inclúen sensores integrados para a regulación da iluminación.
Este investimento está incluído no Plan de investimentos 2025-2029 do Plan de Empresa 2026 desta Autoridade Portuaria, validado polo Consello Reitor do Organismo Portos do Estado, con data 23 de xullo de 2025, dentro da liña de investimento “Mellora da iluminación interior da sede da Autoridade Portuaria” e financiado con fondos europeos MRR.
