A Autoridade Portuaria leva retirados 120 quilos de lixo mariño coas primeiras accións do proxecto Upcycling the Oceans
O Porto de Marín leva retirados 3 metros cúbicos de lixo mariño (uns 120 quilos de residuos) para o proxecto ambiental, Upcycling the Oceans, promovido pola Fundación Ecoalf e Ecoembes, con apoio da Xunta de Galicia, cuxo convenio subscribiu hai uns meses.
O Porto continúa así afondando na liña estratéxica ambiental que lle levou a ser porto pioneiro na participación de proxectos de reciclaxe e retirada de residuos ao longo dos anos como Repesca Plas, Pescal, Nada pola Borda, 3R Fish. Circazul, ML Style e outros.
Este proxecto ten como obxectivo colaborar na limpeza dos océanos e fomentar a circularidade, dando unha segunda vida aos residuos recuperados do mar a través da reciclaxe.
Upcycling the Oceans é un proxecto que se desenvolve a nivel nacional e cuxos residuos transportados a porto son enviados a plantas de clasificación especializadas para o seu tratamento. No caso dos residuos de plástico PET, unha vez transformados en granza, son tratados e convertidos no fío “Mar de Mar” para a elaboración de pezas de vestir de Ecoalf, compostas por poliéster 100% reciclaxe.
O proxecto contempla ademais unha parte importante de estudo e análise xa que en colaboración coa plataforma Marnoba, caracterízanse a cantidade, localización e dispersión dos lixos mariños co obxectivo de contribuír á procura de solucións preventivas.
