ACTUALIDADE

• O ano 2025 pechou con 556,2 millóns de toneladas movidas polos portos españois, o que supón un descenso do 0,3% respecto a 2024. • O documento recolle tamén as características técnicas dos portos, como elemento descritivo da oferta portuaria. Portos do Estado publica o Anuario Estatístico do Sistema Portuario de Titularidade Estatal correspondente a 2025 con toda a información dos portos españois. Ademais, actualízase o Cadro de Mando de Datos Anuais 1962-2025, que permite acceder de forma interactiva a todos os datos de tráfico portuario e establecer comparativas. O Anuario Estatístico de 2025 recolle os datos rexistrados de tráfico portuario de mercancías, de contedores, de buques e de pasaxeiros das 28 Autoridades Portuarias do sistema de interese xeral, así como as características técnicas dos portos. Os datos definitivos de 2025 recolleitos no Anuario confirman que o exercicio pechou con 556,2 millóns de toneladas de mercancías movidas, o que supón un lixeiro descenso do 0,3% respecto a 2024, nun ano marcado por inestabilidade xeopolítica e económica mundial. En canto ao número de pasaxeiros totais, alcanzouse de novo unha marca. Así, en 2025 transitaron polos nosos portos un 4% máis de pasaxeiros que en 2024, totalizando 42,49 millóns, o que volve poñer de manifesto a importancia do sistema portuario estatal para garantir a conectividade e cohesión territorial. Respecto á oferta portuaria nacional, entre os 46 portos de interese xeral ofrécense case 395.000 metros lineais de peiraos, case 100 millóns de metros cadrados de superficie terrestre e áreas de depósito, 2.145 axudas á navegación xestionadas polas Autoridades Portuarias, incluídos 204 faros e luces salientables, entre outros datos. As cifras recollidas neste documento confirman que o transporte marítimo de mercancías segue sendo fundamental para o comercio en España. As súas vantaxes fronte a outros modos son o menor custo unitario para a longa distancia, a facilidade para mover grandes volumes, e o ser un dos máis seguros e menos contaminantes. Aproximadamente o 71% das importacións e o 52% das exportacións realízanse en España por vía marítima, segundo datos da AEAT. Toda a información pode consultarse na seguinte ligazón: https://www.puertos.es/datos/estadisticas/anuales