ACTUALIDADE

O presidente da Autoridade Portuaria Jose Benito Suárez Costa, acompañado de persoal directivo da entidade, reuniuse esta mañá en Madrid con Gustavo Santana, presidente de Portos do Estado e con responsables de diferentes áreas, para presentarlle o Plan de Empresa 2027. Este documento xa fora aprobado inicialmente polo Consello de Administración do porto e agora presentado a Portos do Estado. O Plan de Empresa 2027 para o Porto de Marín adapta a súa estrutura ao Marco Estratéxico do sistema portuario de interese xeral, que supón un documento de referencia no ámbito da planificación portuaria nas dimensións económica, ambiental e social. No capítulo de tráficos, o Plan de Empresa estima un incremento continuado e sostido para o período 2027-2030. No apartado orzamentario debúxase un escenario de máxima prudencia e realismo nas estimacións de ingresos e gastos, tendo en conta o contexto económico actual. O obxectivo é manter o esforzo investidor para adaptarse ás necesidades da demanda que sexa financiariamente sostible. No ámbito dos investimentos destaca a continuidade dos proxectos suxeitos a financiamento europeo tanto de fondos FEDER4 como de FEMPA, dos que a Autoridade Portuaria ten asignadas contías para executar, entre outras, obras relacionadas con automatización do ferrocarril, sustentabilidade e melloras de eficiencia enerxética, intermodalidade ou instalacións pesqueiras.