ACTUALIDADE

A Autoridade Portuaria saca a licitación a redacción do proxecto de estudo e definición de actuacións de mellora a executar en dúas das torres baliza que compoñen a rede litoral de sinais marítimos da Ría. Trátase das torres de Mourisca e Camoucos. A primeira, de 13 metros de altura, ten unha marca lateral de estribor verde cun alcance de 5 millas e a segunda, con 11 metros de tronco, é unha torre lateral de babor vermello cun alcance de 10 millas, ambas fundamentais para garantir a seguridade da navegación no interior da Ría de Pontevedra. Dentro do plan de inspección e revisión de Sinais Marítimos contemplouse a necesidade de acometer o reforzo estrutural das torres co reforzo da cimentación e da envolvente de formigón. A redacción do proxecto de actuacións de renovación necesarias en ambos os sinais ten un prazo de execución de cinco meses unha vez formalizado o contrato coa empresa que resulte adxudicataria no proceso. O orzamento base de licitación é de 106.000 euros. Entre os traballos para realizar para a redacción do proxecto inclúense unha batimetría e estudo topográfico con identificación da morfoloxía do leito mariño na zona para actuar, inspección e diagnóstico de ambas as torres, estudo do clima marítimo e de propagación de ondada e estudo de alternativas en función das necesidades detectadas.